Yeh safar bhi kitna ajeeb hota hai na. Safar se zyaada musafiron ki fikra rehti hai. Aisi teri fikra mai hamaara safar kab khatam ho gaya, pata hi ni chala. Tumhara haath pakad kar chalna mujhe aaj bhi yaad hai. Kaisi meri ungaliyan tumhari ungaliyon se ulajhti hui tumhara haath thaam liya karti thi. Shayad wahi safar tha, wahi lamhe the.
Saari kahaaniyan jab ikattha ho jaati thi. Tum din bhar ki saari baatein jab mujhe bataati thi. Aur mera din chaahe kaisa bhi raha ho, per phir bhi mere chehre per smile aa jaati thi. Shayad wahi safar tha, shayad wahi lamhe the.
Yeh kuch choti-choti kahaaniyan hi hamaari kahaani thi. Agar yeh tab pata hota na, to shayad main tumhe aur acche se jeeta. Tab unn kahaaniyon ke maayine shayad alag hote. Ab na woh choti-choti kahaaniyan hai mere pass aur na hi tum. Bass kuch nishaan baaki hai, waqt ke aur kuch tumhare. Sochta hu unn nishano ko rakhe rakhu ya dafan kar du kahin. Kyunki tumhare bina yeh nishaan bhi be-disha se lagte hai mujhe. Le jaate hai wahan, jahan sirf main hota hu, jahan tum nahi hote. Kuch kahaaniyan shayad bass utni hi hoti hai. Shayad tum bhi sirf utne hi the mere safar mai. Agar pehle hi adhoore hone ka pata hota na, to yeh adhoora safar bhi shayad adhoora ho jaata. Shayad jitna bhi tha, wahi safar tha. Jitne bhi the, wahi lamhe the.
Yeh safar bhi kitna ajeeb hota hai na,
Safar se zyaada musafiron ki fikra rehti hai !
-M. N².
