Woh eleventh mai thi, main tenth mai tha. Woh chahti toh match perfect bhi tha. Per hamesha chidhi-chidhi rehti thi mujhse. Main itni Pyaar se pesh aata tha aur woh ignore karti rehti thi mujhe. Maana, Ke uske jaisa bum nahin tha, per ek baat to hai ke main bhi kuch kam nahi tha. Samjhaata tha itna bhaav khaana accha nahi hota. Problem kya hai ? Main junior hu. Arey ek saal ke age difference se koi ladka baacha nahin hota. Sabke saath toh theek thi, per mere saath aisa behavior kyun tha ? Yaar...uss mai na senior hone ka attitude tha.
Teachers day celebration ke din woh pehli dafa dikhi thi. Sab enjoy kar rahe the DJ ko aur woh apni dhun mai hi magan thi. Nazar padi jab uski taraf to samajh aaya ki love at first sight kya hota hai. Mere chehre pe special smile aa gayi aur ehsaas hua ki aisa bhi kuch hota hai. Mujhe naam bhi nahin pata tha uska. Meherbaani dost ki jo naam maloom pada. Main bass intro karna chahta tha ussey, per usne kabhi mauka hi nahin diya. Apne class ki topper woh, padhti rehti thi class mai bhi. Meri pyaari-pyaari baatein bhi usey, lagti thi bakwaas badi. Hasti rehti thi waise woh, per mujhe dekhte hi itna gussa pata nahi kyun aa jaata tha ? Sach mai....uss mai na senior hone ka attitude tha.
Kisi tarah rozz-rozz uski class mai ghus jaaya karta tha. Uski class teacher meri subject teacher thi, to usey nihaarne ka subah ek bahaana mil jaaya karta tha. Per mujhe toh ussey baat karni thi, sirf dekhne se kaam kahan banne wala tha. To chutti ke time bus ki line mai uski aaj main yeh mauka aazmaane wala tha. Darr to lag hi raha tha itni bheedh mai bezzati hone ka, per usey 'Hii" bol diya maine. Phir kya....uske baad to mujhe bhi pata tha kya hona tha.
Naak pe gussa to rehta hi tha uske, jo bahar aa gaya mujhe dekhte hi. Per usne iss kadar palat kar dekha na, itne kareeb se uska chehra dekha nahi tha pehle kabhi.
Main kho gaya,
Main kho gaya,
Mujhe ho gaya, vishwaas.....ki meri pasand kitni zyada acchi hai. Phir baad mai realise hua ki woh oonchi aawaz mai kuch keh rahi hai. Daant rahi thi shayad, per uski aawaaz bhi maine pehli dafa suni thi aur bass ek khayaal, yaar iski aawaaz kitni zyaada acchi hai. Uska nature hi gussail hai, ya behaviour mere saath hi rude tha ? Yaar lagta hai uss mai na senior hone ka attitude tha.
Kaafi koshish kari maine ki ussey dhang se baat ho sake meri. Per baar-baar ignore kiya usne to meri self-respect bhi ab daav per aa gayi. Baad mai pata laga, meri senior ko bhi uska senior pasand tha. Ab phir inn sab ke beech mai, mera chance to banta hi nahi tha. Phir ek khayaal aaya ki ladkiyon ko zyada unke senior hi pasand aate hai. To main bhi to kitni ladkiyon ka senior hu yaar, to phir juniors pe hi try maarte hai.
-M. N².
