Tum usey bhoolna kyun chahte ho ? Issiliye na kyunki usey yaad kar ke tumhe takleef hoti hogi. Per jab uske saath the tab to khush the na tum, to zaahir hai uski yaadein bhi phir haseern hi hogi. Kuch saalo baad tum apne aap bhool jaoge usey.
Koi bhi hamesha ke liye yaad nahi rehta. Aur phir jab tum guzre lamhe yaad kar ke muskuraane ki koshish karoge na, tumhe sab dhundhla sa dikhega. Phir tum khudh ko kosoge ki uss waqt mujhe gusse mai aake woh photos delete nahi karni chahiye thi. Saath mai jo acche pal guzre the, uski koi to nishaani rakhni chahiye thi.
To yeh saari yaadein sambhaal ke rakho, inhe alag mat karo khudh se. Kyunki abhi tumhe bhi nahi pata, per tum aage yaad karna chahoge usey. Puraani chats padh ke tumhe abhi bura lagega, per baad mai yahi tumhare muskurahat ki shayad wajah bane. Jab tumhe yaad aayega ki kisi se kabhi aisa rishta bhi tha, to ho sakta hai woh photos dekh ke baad mai tumhe accha bhi lage.
Tum dheere-dheere bhool jaoge usey. Per unn haseen palo ko jalaana mat. Abhi gusse mai uski nishaaniyan mita ke, baad mai pachtaana mat.
-M. N².
