| Toh phir juniors pe hi try maarte hai |
Mera naam liye bagair woh mujhe kabhi pukaarti nahi thi. Zyadatar sabko bhaiya bolti thi, per mere naam ke aage kabhi aisa adjective lagaati nahi thi. Zyaada bada nahi tha main ussey, kuch maheeno ka hi difference hoga, auron ko bhaiya aur mujhe mere naam se. Lagta tha mujhse bada khush naseeb koi nahi hoga.
Main khush rehta tha jo sochta tha, shayad woh bhi kuch sochti hogi. Main koi exception hunga shayad, ya thodha mujhe special maanti hogi. Uske peeche to kayi log ghayal the aur ab main bohoton ko chidhaata bhi tha. Main akela shayad uss list mai tha, to maza bhi alag sa aata hi tha. Kuch choti-choti cheezon mai bhi khushi dhoondhne ka alag maza tha. Ek muskurahat jaag jaati thi jab uski aawaaz mai, main apna naam sunta tha.
Per meri khushi ko kisi ki nazar lagi, ya ussi ko iss cheez ki bhanak lagi. Achanak ek din usne bol diya, aap meri kitni care karte ho na. Main muskuraane laga nazrein jhuka ke, socha ab kuch ho sakta hai aage. Aisi baatein kabhi suni nahin thi, ya yuh kaho ki mujhse kisi ne kahi nahin thi.
'Aap mujhe acche lagte ho' - Usne kaha.
'Tum bhi mujhe pasand ho' - Maine jawab diya.
Main poore feel mai aa chuka tha. Socha nahi tha per waisa ho raha tha. Aankhon se aankhon ki baatein phir woh kaat ke boli - 'Iss raksha bandhan pe na aapko raakhi baandhungi. Aap sweet ho, caring ho bohot acche ho. To kya aap mere bhai bann sakte ho....?'
Ek second....Yeh maahol create kiya usne bhai ka proposal dene ke liye ? Mujhe itna gussa aa raha tha na, ki mil hi nahin raha tha kuch kehne ke liye. Raksha bandhan aa rahi hai to raakhi pehnaane ka mann ho raha hai, abhi pehle valentine's day bhi to aaya tha, tab to rose diya nahi tha.
Main kya bolta ussey........? Mujhe hurt ho gaya tha.
Jo ummeed kabhi ki nahi thi aisa kuch ho gaya tha !
Main caring hu aur tum iske liye mujhe bhai banaana chahti ho ? To main kuch aur banke bhi caring ho sakta hu na. Ek mauka do, main aisa hi rahunga. Koshish karke dekho, Kabhi to samjho na.
Main ussey kehne hi waala tha ki please bhai nahi, accha nahi lagta. To ussey pehle usne hi kaha, - 'Sorry....Dare mila tha. Aap bhai waale material ho bhi nahi waise, hum friends hi acche hai.'
Hhuuu....iss dare ne to meri jaan hi nikaal ke rakh di thi yaar. Chalo ab thodhi saans le sakte hai. Main muskuaraaya thodha usey dekh kar. Darr gaya tha yeh sunn kar. Friend ke level se aage uthna chahta hu, aur abhi reh jaata bhai bann kar.
Main khushi-khushi ghar gaya uss din. Chalo friend to bola tha usne first time. Per ek baat kehna chahta hu, yaar tum crush ho to crush ki tarah raho, pata tumhe bhi hai. Phir mazaak mai bhi bhai mat kaho. Hum bass friend hi hai kya ? yeh sochte-sochte yeh raat kat gayi. Uske haan kehne ke baad zindagi ki ab ek nayi kahaani shuru ho gayi.
-M. N².
