Main uske liye bass ek just friend ki tarah tha,
Uske headphones ke replacement ki tarah tha !
Usko safar mai koi time kaatne ko,
koi baat karne wala chahiye tha,
Mujhme koi aisa usko interest vinterest nahi tha !!
Per ussey bass Hii-Hello wali to meri baat hi nahi hoti thi. Mujhe aisa lagta tha ki woh apni personal baatein bhi mujhse share karti thi. Main phir just friend wala relationship isko kaise Maan leta ? Per woh to bass just friend, just friend ki hi ratt lagaye rakhti thi. Main bhi apne dil se rozz kehta tha ki usko friend ki nazar se dekha kar, per uski smile hi itni qaatil thi ki dil se reply bass ek hi aata tha, bro...it's impossible.
Woh jab aati thi to uske chehre ke glow se mera chehra glow karne lagta tha. Woh pure din itni fresh-fresh na jaane kaise rehti thi ? Uski wajah se main bhi taaza dikhne lagta tha. Woh baith'ti to apne friend ke saath thi, per main apni crush ke saath baith'ta tha. Mera dil ander hi ander machalta rehta tha per usko koi fark hi nahi padhta tha. Meri age ke ladko ko to woh bhaiya keh kar bulaati thi. Main bhi to ussey ek saal hi to badha tha, phir mujhe woh mera naam lekar kyun pukaarti thi ?
Per iss friend-friend ke tag se main khush nahi tha. Pehli baar koi ladki itni close aayi thi, to mujhe laga ki yeh mauka tha. Zyada himmat karke maine, thodha healthy waala flirt karna ussey shuru kar diya. And guess what happened ? woh gussa bhi nahi hui, usey ajeeb bhi nahi laga, and i thought yeh to kaam kar gaya.
Zyada mushkuraati thi woh meri baaton per ab, aur mujhe pagal bhi kehti thi. To ab just friend ke level pe yeh mere liye bahut badi progress thi. Main chahta tha ki woh bhi mere liye wahi feel kare jo main uske liye kar raha hu, mere bhagvaan meri itni si hi to wish thi.
Ab main uska jo haath pakad leta tha, to usko zara bhi ajeeb nahi lagta tha. Ab mere mann mai yeh baat aane lagi thi ki ab main uske liye bass just friend ki tarah to nahi ho sakta tha. Usko bhi to ander se kuch feel ho raha hoga. Mujhse kuch kehne ka uske mann bhi zeal ho raha hoga. Issi suspense ne bass meri excitement badha rakhi thi, ki kab meri crush meri girlfriend mai badlegi ?
Aur woh hints dene ke naam pe to superb thi. Ki jab uska achanak hi mann hua ki woh mere muh se koi non-veg joke sune. Bahar-bahar se main sharma raha tha aur mann mai excited hokar yeh soch raha tha ki kaunse badhiya wale jokes mujhe uss waqt yaad the.
Main ussey ab ss level ki baaton per pahuch chuka tha ki jo ab aam nahi thi. Ab main ussey jo thodhi door bhi chala jaata tha, to woh khudh mere pass aa jaati thi. Aur ab koi yeh kaise keh sakta tha ki woh mujh mai interested nahi thi. Ab mere aur uske charche thodhe mashoor ho gaye the. Auron ki nazron mai hum relationship mai aa gaye the, per woh abhi bhi apni baat pe stick thi ki hum bas friend the. Nahi...aisa to nahi ho sakta.
Phir maine khudh hi dimaagh lagaya, ki shayad woh duniya ko nahi bataana chahti hogi, per ander hi ander mujhe chahti hogi. Ladkiyon ke funde to waise bhi mere sar ke uper se jaate hai. To maine hi socha kyun na isey seret relationship naam de jaate hai. Per abhi tak maine usey mere dil ki baat kahi nahi thi. Kya karta ? Koi perfect timing hi nahi mil rahi thi. Per yeh dosti ab uss verge tak pahuch gayi thi, ki mujhe yakeen tha, ki woh mere proposal pe haann hi karegi. Main bahut khush rehne laga tha, hamesha smile karte rehta tha. Main usko ab seriously dil se chahta tha, yeh sab kuch uper-uper se nahi tha. Woh indications deti rehti thi, mera confidence badhta rehta tha. Aur poori raat main bass yahi sochta rehta tha, ki ab kal to usey propose kar hi dunga.
To maine bhi ek date final kardi ki ab jo hoga issi din hoga. And finally date bahut jaldi aa gayi. Kyunki mujhse intezaar hi nahi ho raha tha. 2 chocolates rakhli maine bass pyaar se usey khilaane ko. Unn chocolates se hi jeb khaali ho gayi, but uss school time mai kaafi tha impression jamaane ko. Poori practice, poori rehearsal karke baal theek-thaak ja hi raha tha uske pass. Nazar padhi to dekha ki koi aur tha uske saath. Deewar ke kone per woh kahi khade the, jahan jagah bhi nahi thi do logon ke khade hone ki. Per maine bhi apne dil ko samjhaya ki woh koi dost bhi to ho sakta hai. Itni kya jaldi hai tootne ki ?
To main todhi pass gaya aur ek side mai chupke unki baat sunne ki koshish kari. Shayad woh jo ladka tha na....uska birthday tha aur woh usko gift kar rahi thi badhi hi expensive ghadhi. Meri jeb mai chocolate padhi-padhi pighalne lagi, per woh jiski wajah se pighal rahi thi woh kahi aur hi thi khadi.
Unki baatein sunn kar lag raha tha ki woh bass dost to nahi the. Kyunki unki saari baatein romantic type ki aur baby-baby kar ke ho rahi thi. Aankhon mai aanshu liye main wahan se chala gaya. Kyunki woh to bass usey gale milne mai busy thi. Woh chocolate meri pant ki pocket mai rakhi-rakhi kab pighal kar paani ho gayi, pata hi nahi chala ? Mujhe bass itna maloom tha ki ab mujhe ussey attraction nahi, pyaar ho gaya tha.
Set life upset ho gayi,
Eyes thodhi si wet ho gayi !
Woh mere itna close ho kar,
Kisi aur se set ho gayi !!
Pehli baar itni khushi ki wajah meri zindagi mai aane wali thi. Per qismat hi meri aisi nikli, ki yeh bhi sab ki tarah commited nikli. Usne indications bhi to itne diye ki jaise woh mujh mai interested thi. Aur galti bhi to uski thi, ki usne kabhi bataya hi nahi ki woh commited thi. Meri jo bhi thodhi bahut excitement thi, aaj unn sab ka end ho gaya tha. Main uska just friend tha na........just friend hi reh gaya tha.
-M. N².
